திருப்பள்ளி எழுச்சி பாடல் எண்.6 உரைவிளக்கம்.
ஒருமையின் உலகெலாம் ஓங்குக எனவே
சன்மார்க்கம் என்றால் பொதுவாக அறநெறி; நல்வழி என்று பொருள் கொள்ளலாம்.
அறநெறிகளும், நல்வழிகளும் பொய்யான போக வாழ்க்கையில் ஈடுபடும் மனதைத் திருத்தி அதை இறை அனுபவத்தை நோக்கிச் செலுத்தவதற்காகவே ஏற்பட்டன.
இந்த நெறிகளால், மக்கள் அழிவைத் தரும் உலகியல் தொடர்பை அறுத்துக் கொள்ள முடியவில்லை. அவரவர்கள் விரும்பியதை நிறை வேற்றிக் கொள்வதற்குத்தான் அந்த நெறிகள் ஓரளவு பயன்பட்டன. அந்த சன்மார்க்கங்களால் பெரும் நன்மை ஒன்றும் ஏற்பட்டு விடவில்லை.
கடவுள் அனுபவமான பேரின்பத்தைப் பெறுவதற்கே நம் உடம்பு பயன் பெற வேண்டும். ஓங்கார தத்துவ நிறைவை உடையது மனிதனின் புனித உடல்.
கடவுள் நித்தியமானவர். அவர் உடலின் உள் இருக்கும் ஆன்ம வடிவை மட்டும் பற்றிக் கொண்டு விடுவாரானால் உடல் உயிர் அற்று வீழ்ந்து விடும். அந்த உடலைப் பெற்றிருந்த ஆன்மாவின் ஆனந்த அனுபவமும் அத்தோடு முடிந்து போய்விடும். ஆன்மா மட்டும் கடவுளுடன் கலந்து போய்விடும்.
இதுவரை எத்தனையோ ஆன்மாக்கள் இவ்வாறு தங்கள் புனித உடலைப் பூமியிலே கிடத்திவிட்டுக் கடவுளுடன் கலந்து போயிருக்கின்றன.
ஆன்மா தம் உடலை விட்டுப் பிரிந்து போவதால் அந்த ஆன்மா தம் உடல் உடன் இருந்து அனுபவித்து வந்த பேரின்ப நிலையையும் இழந்து விடுகிறது. இதைத்தான் ஜீவன்முக்தி நிலை என்று சைவ சித்தாந்தம் சொல்கிறது !
இது எப்படி நியாயமாகும் ?
ஆன்மாவும் உடலும் சேர்ந்து இருக்கும்போது தான் பேரின்பத்தை அனுபவிக்க முடியும் என்பதை, சுத்த சன்மார்க்கம் தெளிவாகத் தெரிவிக்கிறது.
இப்போது சுத்த சன்மார்க்கத்தைப் பற்றித் தெரிந்து கொள்வோம்.
கடவுள் ஒருவரே. அவர் அருட்பெருஞ் ஜோதியாய்த் தனிப் பெருங் கருணையுடன் இருப்பவர். இதை விளக்கிக் காட்டுவதுதான் சுத்த சன்மார்க்கம்.
அந்த உயிரின் உடலுக்கு அதன் அதன் தன்மைக்கு ஏற்ப அனுபவங்களைக் கொடுத்து அதை மேல் நிலைக்கு உயர்த்திக் கொண்டு இருக்கிறது.
ஒவ்வொரு உடலில் இருக்கும் உயிரையும் இயக்கிக் கொண்டிருப்பவர் அருட்பெருஞ் ஜோதி ஆண்டவர். அவர் நித்தியமானவர். ஒவ்வொரு உயிருக்கும் அருள் ஞானம் உண்டாக்கும் கருவியாகவே அருட்பெருஞ் ஜோதியின் தனிப்பெருங்கருணை அந்த உயிர்களுக்கு உடலைக் கொடுத்திருக்கிறது.
ஒவ்வொருவரும் அருட்பெருஞ் ஜோதி இல்லாமல், தான் இல்லை என்பதை உணர வேண்டும். அதன் தனிப் பெருங் கருணையாகிய ஜீவர்களிடம் தயவு காட்டுவதை ஒவ்வொருவரும் வளர்த்துக் கொள்ள வேண்டும்.
தங்கள் உயிர், உடல், சிந்தனை, சொல் செயல் முதலியவற்றில் எல்லாம் அருட்பெருஞ் ஜோதியை நிறைத்துக் கொள்ள வேண்டும்.
அப்போது நம் உள் இருந்து ஆள்கின்ற அருட்பெருஞ் ஜோதியின் தயவே அங்கிருந்து அனகமுற விரிந்து எல்லாவற்றையும் தன் வண்ணமாக ஆக்கிக் கொள்கிறது. அந்த ஆன்மாவின் உடல் அருட்பெருஞ் ஜோதியின் தனிப் பெருங் கருணை மயமாகவே மாறி விடுகிறது.
நம் உள் இருக்கும் இறைவனை உணர்ந்து அவர் அருளுடன் அனகமுற வாழ்கின்ற பேரின்பப் பெரு வாழ்வுதான் சுத்த சன்மார்க்கம். சுத்த சன்மார்க்கத்தில் ஒருவன் தன் தூல உடம்பை இழப்பதில்லை.
ஒருவன் செய்கின்ற அருட்பணி காரணமாக அருட்பெருஞ் ஜோதியின் தனிப்பெருங்கருணை, அவன் தூல உடம்பில் இருக்கும் ஒவ்வொரு உயிர் அணுவிலும் புகுந்து பரவுகிறது. இதன் மூலமாக அந்தத் தூல உடம்பின் அசுத்தம் நீங்கி விடுகிறது. அது சுத்த உடல் ஆகிறது. மரணம் இல்லாத நித்தியத் தன்மையைப் பெற்றுவிடுகிறது.
இந்த உண்மையை நன்றாக அறிந்து சுத்த சன்மார்க்கிகள் இதன் புகழையே பேசிக்கொண்டு இருக்கிறார்கள். சுத்த சன்மார்க்கத்தின் பெருமையை அறிந்து கொண்ட பெரியோர்கள் வேறு கற்பனை மார்க்கங்களின் கதைகளைப் பேசி வீண் பொழுது போக்க மாட்டார்கள்.
அருட்பெருஞ் ஜோதி ஆண்டவர் அம்பலத்தில் சித்தாடல் புரிந்து கொண்டிருக்கிறார். அவர் அருமையும், எளிமையும் இவை இரண்டும் அல்லாத நிலைமையும் உடையவர்.
உயிர்ப்பணி செய்து வருவதன் மூலமாகத்தான் ஒருவர் தன்னிடம் இருக்கும் அகங்காரத்தைப் போக்கிக் கொள்ள முடியும். அகங்காரத்தைப் போக்கிக் கொண்டவர்களுக்கு ஆண்டவன் அருள் எளிதாகக் கிடைக்கிறது.
உயிர்ப்பணி புரியாமலும், இரக்க உணர்வு இல்லாமலும், கருணை இதயம் பெறாமலும், வெறும் கல்வித் திறமையைக் காட்டும் ஆணவமுடையவர்களுக்கு இறைவன் அருள் கிடைப்பது அருமையாகும்.
இவர்களுக்கு ஆண்டவர் அருமையாக இருக்கிறார்.
உயிர்ப்பணி புரியாமலும், அதே சமயத்தில் கல்வித் திறமை இல்லாமலும் இருக்கும் சாதாரண மக்களுக்கு இறைவன் எங்கும் இருக்கின்றவராகவும் இருக்கிறார். அவர்களால் கண முடியாதவராகவும் இருக்கிறார். ஆத்திகர்க்கு அவர் இருக்கின்றவராகவும், நாத்திகர்க்கு அவர் இல்லாதவராகவும் இருக்கிறார். பொதுமக்களுக்கோ இறைவன் இந்த இரண்டும் இல்லாத மத்திய நிலையில் இருக்கிறார்.
அருட்பெருஞ்ஜோதி அரசே 1 எனக்கு இருமையையும், அளித்திருக்கிறீர்கள். எனக்குத் தந்திருக்கின்ற இந்த இருமையின் பெருமையை யார் அறிவார் ?
இந்தப் பிறவியை இம்மை என்றும், மறு பிறவியை மறுமை என்றும் சித்தாந்திகள் சொல்வார்கள்.
எனக்கு இப் பிறவியிலேயே இறப்பும், பிறப்பும் இல்லாத பெரு வாழ்வான மறுமையை அல்லவா தந்திருக்கிறீர்கள்.
சைவ சித்தாந்திகள் சொல்கிற இம்மை மறுமை என்ற இருமையில் என்ன பெருமை இருக்கிறது ?
சித்தாந்திகள் கருத்துப்படி இம்மை நீங்கினால் அல்லவா மறுமை என ஒன்று வந்து அடைய வாய்ப்பு இருக்கும் ? இப் பிறவி போனால் அல்லவா மறுபிறவி ஏற்பட முடியும் ?
என் தூல உடல்தான் அழியாத நித்திய உடலாக மாறிவிட்டதே. எனக்குப் பேரின்ப பெரு வாழ்வையே அல்லவா அளித்திருக்கிறீர்கள். நான் பெற்றிருக்கும் இந்த இருமை சுத்த சன்மார்க்க இருமை ஆயிற்றே. சைவ சித்தாந்திகள் கூறும் இப் பிறவியையும் மறு பிறவியையும் குறிக்கும் அழிவைத் தரும் இருமை அல்லவே.
இந்த நிலையான இருமையை எனக்கு அளித்து உலகை எல்லாம் வாழ்வித்து ஆளும் அருளையும் தந்திருக்கிறீர்கள் ! வாழ்க தங்கள் தனிப்பெருங்கருணை !
சுத்த சன்மார்க்கத்தின் நிலையான இருமையை எனக்கு வழங்கியதுடன் என் திருப்பள்ளியில் இருந்தும் எழுந்து இருக்கிறீர்கள். தேவரீர் அனகமுற்று என்னை ஆண்டருள வேண்டும் என்பதே அடியேன் விண்ணப்பமாகும்.
To register to this vallalargroups, and Old Discussions http://vallalargroupsmessages.blogspot.com/
To change the way you get mail from this group, visit:
http://groups.google.com/group/vallalargroups/subscribe?hl=en
அருட்பெருஞ்ஜோதி அருட்பெருஞ்ஜோதி
தனிப்பெருங்கருணை அருட்பெருஞ்ஜோதி
எல்லா உயிர்களும் இன்புற்று வாழ்க
No comments:
Post a Comment